MNYF Lawngtlai chuan, Autonomous District Council pathum Chief Executive Member te; PC. Lalmuanthanga, CEM LADC, M. Laiko, CEM MADC leh Rishik Mohan Chakma, CEM CADC te hian kan Chief Minister hi hmuh an tum a, M. Laiko hian July 15, 2024 (Thawhtanni) khan ziakin Addl. PS to Chief Minister hnenah Chief Minister hmuh an duh thu a thlen a, hei mai bakah hian tawngka pawhin reilote Chief Minister an hmuh duh thu leh appointment pe ngei turin a dil a. Engmah chhanna a awm lo, an ti.

Hei mai bakah hian Lawngtlai West bialtu MLA C. Ngunlianchunga’n thawhlehni khan Chief Minister chu Whatsapp kaltlanga biain, ADC CEM pathum ten hmuh an duh thu leh hun pe hram turin a ngen sak a. Chief Minister chuan party office-a nilenga a thut tur thu a chhangin, zingkarah tal hun pe turin Lawngtlai West bialtu MLA hian a ngen leh a, Chief Minister hian a changtu Minister hmu tura lo hrilhin, C. Ngunlianchunga hian Chief Minister a nihna anga hmuh an duh thu leh hun siamsak turin a ngen leh a, hemi hnu hian chhanna a awm lo, tiin an tarlang.

July 17, 2024 (Nilaini) khan Deputy Resident Commissioner, Lai House, LADC chuan Private Secretary to Chief Minister hnenah ADC CEM pathumte tan appointment a dil leh a, hei pawh hi an pe thei chuang lo. 

Kawng hrang hrang hmanga ADC CEM pathum ten Chief Minister hmu tura appointment dila pek an ni lo leh Chief Minister-in kan ADC CEM hi a hmu duh lo hi ADC mipuite hmusitnaah kan ngai a. ADC te duhsak tur anga insawi si, ADC hruaitu lu te tana hun pawh nei leh si lo hi ADC te duhsaktuah kan ngai lova. Hun lo kal zel turah hetiang thil hi thleng tawh lo se tih hi MNYF Dist. Hqrs. Lawngtlai chuan kan duh hle a ni, tiin an tarlang.